Sakinlər

Hadisələri 1920-ci illərin İrlandiyasında cərəyan edən «The Lodgers» filmi kimsəsiz bir malikanədə qapanıb qalmış əkizlər Reyçel və Edvardın hekayəsindən bəhs edir. Hər gecə bu qədim evin idarəsi qorxunc bir qüvvənin əlinə keçir. Həmin varlıq bacı ilə qardaşa qəti qadağalar qoyur: gecə yarısına kimi yataqda olmaq, qapıdan kənar adam buraxmamaq və evi heç vaxt tərk etməmək, əks halda digər əkizin həyatı təhlükəyə düşəcək.

Yaxınlıqdakı kəndə müharibə veteranı Şonun qayıtması ilə bu qorxulu nizam pozulur. Gənc oğlanla tanışlıqdan sonra Reyçel təhlükəyə baxmayaraq sirli qanunları tapdalamağa cəsarət edir. Qadağaların pozulması evdəki naməlum qüvvəni hərəkətə gətirir.

İrlandiya istehsalı olan bu filmin rejissoru Brayan O’Mallidir. 2017-ci ildə ekranlara çıxan lentdə Bill Milner, Elayca İqan, Devid Bredli və Mo Danford kimi aktyorlar çəkiliblər.