Zəlzələ quşu

1980-ci illərin sonunda Tokio şəhərində yaşayan Lyusi tərcüməçi kimi çalışır. Ailə qayğılarından uzaqlaşmaq üçün Yaponiyaya köçən gənc qadın yad mühitdə olduqca qapalı həyat tərzi sürür. Lakin Tokio körfəzində tapılan qadın meyitinin qalıqları onun sakit günlərinə son qoyur və qəfil itkin düşmüş rəfiqəsi Lilinin qətlə yetirildiyi ehtimal edilir.

Şübhəli şəxs qismində dindirilməyə çağırılan Lyusi polislərə keçmişdə baş verənlərdən danışmağa məcbur olur. O, küçədə qarşılaşdığı fotoqraf Teyci ilə münasibətlərini və xasiyyətcə onun tam əksi olan Lili ilə necə dostlaşdığını addım-addım xatırlayır. İstintaq irəlilədikcə fərqli xarakterli iki qadının və fotoqrafın ortaq keçmişi aydınlaşır.

«Earthquake Bird» filmi rejissor Uoş Uestmolend tərəfindən 2019-cu ildə lentə alınıb. ABŞ, Böyük Britaniya və Yaponiya istehsalı olan ekran əsərində baş rolları Alisiya Vikander, Keniti Masuda, Kristal Key və Niklas Eriksson canlandırıb.