Solaris

Psixoloq Kris Kelvin bütövlükdə nəhəng Okeanla örtülmüş sirli Solaris planetinin orbitində yerləşən elmi stansiyaya yola düşür. Mütəxəssisin vəzifəsi oradan daxil olan qəribə məlumatları araşdırmaq və nəticəsiz qalan bütün tədqiqat proqramını ləğv etməkdir. Kosmik bazaya çatdıqdan sonra o, burada fəaliyyət göstərən azsaylı alimlərin qeyri-adi davranışları ilə üzləşir.

Əvvəlcə həmkarlarının ağlını itirdiyini düşünən Kris tezliklə özü də müəmmalı hadisələrin içinə düşür. Planet onun şüurundakı ən dərin xatirələri canlandırır və qəfildən qarşısında bir müddət əvvəl intihar etmiş həyat yoldaşı Hari peyda olur. Baş qəhrəman keçmişin kabusları ilə sirli aləm arasında tək qalır.

«Solaris» bədii filmi 1972-ci ildə SSRİ-də rejissor Andrey Tarkovski tərəfindən ekranlaşdırılıb. Detektiv və dram elementləri daşıyan elmi-fantastika filmində əsas rolları Donatas Banionis, Natalya Bondarçuk, Yuri Yarvet və Vladislav Dvorjetski canlandırıb.