Birgə Təhlükəsizlik Zonasında

Şimali və Cənubi Koreya sərhədində yerləşən Panmuncom atəşkəs kəndi iki ölkəni ayıran xüsusi məkandır. Burada baş verən qəfil atışma nəticəsində şimal tərəfdən hərbçilər həlak olur, cənub təmsilçisi isə yaralanır. Hadisənin səbəbləri ilə bağlı hər iki tərəf bir-birinə zidd ifadələr irəli sürür.

Vəziyyəti araşdırmaq üçün neytral dövlətlərin nümayəndəsi təhqiqata cəlb edilir. Müstəntiq sağ qalan şahidləri dindirərək həmin gecə nələrin yaşandığını dəqiqləşdirməlidir. Lakin dindirmələr zamanı əsgərlərin həqiqəti gizlətməyə çalışdığı və qaranlıq məqamların olduğu üzə çıxır.

«Birgə Təhlükəsizlik Zonasında» (J.S.A. Joint Security Area) filmi 2000-ci ildə Cənubi Koreyada istehsal olunub. Triller və dram janrındakı ekran əsərinin rejissoru Pak Çhan-ukdur. Baş rollarda Li Byon-hon, Son Qan-ho, Li Yon-e və Kim The-u çəkiliblər.