Ölüm otağı

İşsiz qalmış iki proqramçı kimsəsiz yolda avtomobillə bir kişini vuraraq onun ölümünə səbəb olur. Qurbanın yanında iki milyon avro ilə dolu çanta tapan dostlar cəsədi gizlədərək pulu mənimsəyirlər. Lakin onlar həmin şəxsin oğurlanmış qızını xilas etmək üçün fidyə aparan ata olduğundan xəbərsizdirlər.

İstədiyi məbləği ala bilməyən cinayətkar uşağı qətlə yetirir və cəsədə vaxtilə Fransada məşhur olan gəlincik geyimini geyindirir. Bu qorxunc hadisənin araşdırılması əkiz uşaqlar dünyaya gətirdikdən sonra xidmətə yenicə qayıdan gənc polis əməkdaşı Lüsi Annabelə həvalə olunur. Təhqiqat yenicə başlayarkən qatil daha bir qız uşağını qaçırır.

«Ölüm otağı» (La chambre des morts) filmi 2007-ci ildə Fransada rejissor Alfred Lot tərəfindən lentə alınıb. Triller janrında olan ekran əsərində rolları Selin Sallett, Arno Karbonnye, Antuan Oppenhaym və Gérard Pinteau canlandırıb.