All I See Is You

Uşaqlıqda baş verən bədbəxt hadisə nəticəsində görmə qabiliyyətini itirən Cina buna baxmayaraq ailə qurub xoşbəxt yaşamağı bacarmışdı. Həkim qəbulunda olarkən cütlük yeni müalicə üsulunun köməyi ilə qadının yenidən görə biləcəyini öyrənir. Həyat yoldaşı əməliyyatın xərcini qarşılayır və sarğılar açılandan sonra Cinanın qarşısında rəngarəng bir dünya açılır.

Gözləri açılan Cina vaxtilə məhrum olduğu hər şeyi, o cümlədən başqa kişilərlə münasibətləri və öz cəlbediciliyini kəşf etməyə çalışır. Lakin xanımının bu cür sərbəstləşməsi həyat yoldaşı Ceymsi qətiyyən sevindirmir. O, Cinanın əvvəlki kimi yalnız ona bağlı qalması və ancaq ondan asılı olması üçün hər addımı atmağa hazır vəziyyətə gəlir.

«All I See Is You» dramatik detektiv filminin quruluşçu rejissoru Mark Forterdir. ABŞ və Tailandın ortaq istehsalı olan bu ekran əsəri 2016-cı ildə təqdim edilib. Əsas rolları Ceyson Klark, İvonn Straxovski, Mikel Fernandes və Conatan Semson canlandırıblar.