Qattaka

İnsanların laboratoriyalarda qüsursuz genlərlə doğulduğu bir dövrdə təbii yolla dünyaya gələnlər ikinci dərəcəli hesab olunur. Doğuşdan ürək qüsuru olan Vinsent Friman cəmiyyət tərəfindən yararsız elan edilib və onun cəmi otuz il yaşayacağı proqnozlaşdırılıb. Bütün bunlara baxmayaraq, gənc oğlan qadağan olunmuş ulduzlararası uçuş arzusundan əl çəkmək istəmir.

Vinsent mövcud qaydaları aldatmaq üçün başqa birinin genetik materiallarından istifadə edərək aerokosmik şirkətə daxil olmağı bacarır. O, təhlükəsizlik yoxlamalarından keçib Titana təşkil olunacaq ekspedisiyanın heyətinə seçilir. Lakin laboratoriya daxilində törədilən qəfil qətl hadisəsi və başlayan təhqiqat onun əsl kimliyinin üzə çıxması təhlükəsini yaradır.

«Qattaka» fantastik dram filmi 1997-ci ildə ABŞ-da rejissor Endrü Nikkol tərəfindən çəkilib. Baş rolları İtan Houk, Cud Lou, Uma Turman və Alan Arkin canlandırıblar.