Şokolad üçün təşəkkürlər

Mari-Kler və Lizbet gənclikdən bəri çox yaxın rəfiqə olublar. Lizbet pianoçu Andre Polonski ilə ailə qurduqdan və bu nikahdan Giyom adlı oğulları dünyaya gəldikdən sonra da qadınların dostluğu davam edib. Toylarının onuncu ildönümündə Lizbet sükan arxasında yuxuya gedərək avtomobil qəzasında həyatını itirib. Bir müddət sonra şokolad fabrikinin sahibi olan Mari-Kler dul qalmış Andre ilə evlənib və onlar kənardan son dərəcə xoşbəxt görünən bir cütlüyə çevriliblər.

Konservatoriya tələbəsi Janna Pulenin onların evinə gəlməsi bu sakit mühiti pozur. Gənc qız Andrenin onun bioloji atası olduğunu iddia edir. Bu gözlənilməz iddia ailənin keçmişindəki qaranlıq məqamları yenidən üzə çıxarır.

Fransa və İsveçrə birgə istehsalı olan «Merci pour le chocolat» triller filmi 2000-ci ildə nümayiş olunub. Ekran əsərinin rejissoru Klod Şabroldur, baş rolları isə İzabel Yüpper, Jak Dütron, Anna Muqlalis və Brijit Katiyon canlandırıb.