Şübhə altında

Özəl xəfiyyə Toni ailəli şəxslərə boşanmaq üçün sübutlar təqdim etməklə məşğul olur. O, öz həyat yoldaşı Heyzelin köməyindən istifadə edir: qadın hədəf seçilmiş kişiləri yoldan çıxarır, Toni isə xəyanət anını kameraya çəkir. Lakin Milad ərəfəsindəki növbəti plan faciə ilə nəticələnir. Toni otel otağına daxil olanda həm Heyzelin, həm də həmin şəxsin cəsədini aşkar edir.

Öldürülən şəxs məşhur rəssam çıxır və onun qoyub getdiyi mirası bölüşdürmək üçün keçmiş sevgilisi ilə dul qalmış arvadı mübarizəyə başlayır. Qətllərin araşdırılması zamanı hüquq-mühafizə orqanlarının əsas şübhəlisi məhz Toni olur.

Böyük Britaniya istehsalı olan «Under Suspicion» adlı detektiv triller filmi 1991-ci ildə ekranlara çıxıb. Rejissor Saymon Murun çəkdiyi bu filmdə baş rolları Tommi Rayt, Li Uitlok, Meqqi O'Nil və Stefen Oksli canlandırıb.