Qatillər

Muzdlu qatillər Çarli və Li keçmiş yarış pilotu Conni Nortu qətlə yetirirlər. Lakin hədəfin ölüm ayağında qaçmağa belə cəhd göstərməməsi onların diqqətini çəkir. Eyni zamanda cütlük Nortun bir milyon dollarlıq böyük qarətdə əli olduğunu bilir və bu məbləğin izinə düşmək qərarına gəlir.

Pulu tapmaq üçün qatillər keçmiş idmançının həyatını addım-addım araşdırmağa başlayırlar. Onlar Conniyə yaxın olan şərikləri, sevgilisini və ən əsası bu qətlin sifarişçisini taparaq keçmişdə baş verənləri üzə çıxarırlar.

1964-cü ildə ABŞ-da istehsal olunmuş «The Killers» filminin rejissoru Don Sigeldir. Ekran əsərinin baş rollarında Li Marvin, Enci Dikinson, Con Kassavetis və Klu Qulaqer çəkiliblər.