Sonuncu arqument

Uğurlu vəkil Yuliya Boqatıryovanın firavan günləri ərinin avtomobil qəzasında həlak olması ilə alt-üst olur. Dərin sarsıntı keçirən qadın işini tərk edir və kədərə qərq olur. Qaynanası isə bu vəziyyəti əsas gətirərək nəvəsini anasından almaq və Yuliyanı valideynlik hüququndan məhrum etmək niyyətinə düşür. Qızını qorumaq istəyən ana psixoterapevt Andrey Orlova üz tutur.

Lakin çox keçmədən həkimin özü ciddi bəlaya düçar olur: onu pasiyentini qətlə yetirməkdə suçlayırlar. Yuliya vəkillik fəaliyyətini bərpa edərək Andreyin müdafiəsini öz üzərinə götürür. İstintaq prosesində o, keçmiş ailə səadətinin əslində böyük bir yalandan ibarət olduğunu və öz həyatının da ciddi təhlükə altında qaldığını anlayır.

Rejissor Olqa Land tərəfindən çəkilmiş Rusiyanın «Sonuncu arqument» («Последний довод») detektiv filmi 2017-ci ildə işıq üzü görüb. Ekran əsərində baş rolları Nadejda Borisova, Petar Zekavitsa, Sergey Qubanov və Aleksandra Vasilyeva canlandırıblar.