Paharganj

İspaniyalı Laura Kosta itkin düşmüş sevgilisi Robertin izinə düşərək Dehlinin təhlükəli məhəllələrindən sayılan Paharganca yollanır. O, burada qardaşının vaxtsız vəfatından sarsıntı keçirən və öz çətinlikləri ilə vuruşan yerli basketbol məşqçisi Qautam Menonla tanış olur.

Eyni vaxtda ərazidə narkotik bazarına nəzarət uğrunda cinayətkar qruplaşmalar arasında toqquşmalar kəskinləşir və siyasi qətl hadisəsi baş verir. Çox keçmədən Lauranın axtarışları ilə küçələrdəki qanlı qarşıdurmalar arasında gizli bir əlaqənin olduğu üzə çıxır.

Hindistan istehsalı olan «Paharganj» detektiv triller filmini rejissor Rakesh Ranjan Kumar ərsəyə gətirib. 2019-cu ildə işıq üzü görən layihənin baş rollarını Lorena Franko, Bicesh Jayarajan, Neet Chowdhary və Rajeev Gaursingh canlandırıb.