Qaranlıqdakı qızlar

Məktəb direktorunun qızı və əlaçı şagird İtsumi Şiraişi binanın damından yıxılaraq həyatını itirir. Həmyaşıdlarının həsəd apardığı bu qızın əlində zanbaq çiçəyi tapıldıqdan sonra məktəbdə müxtəlif şayiələr yayılmağa başlayır. Şagirdlər bunun intihar deyil, qətl olduğunu və hadisənin İtsuminin rəhbərlik etdiyi ədəbiyyat dərnəyinin üzvləri tərəfindən törədildiyini düşünürlər.

Klubun yeni rəhbəri və İtsuminin rəfiqəsi olan Sayuri Sumikava həqiqəti üzə çıxarmaq üçün öz təhqiqatına başlayır. O, dərnək üzvlərinə həlak olmuş qız və onun ölümü haqqında hekayə yazmağı tapşırır. Sayuri bu yazılar vasitəsilə cinayətkarın özünü büruzə verəcəyinə ümid bəsləyir.

Yaponiya istehsalı olan «Ankoku joshi» detektiv filmi 2017-ci ildə nümayiş olunub. Ekran əsərinin quruluşçu rejissoru Saici Yakumodur, baş rolları isə Fumika Şimizu, Marie İitoyo, Yudai Çiba və Riria Baba canlandırıblar.