Maska

Özünə güvənən və qızların diqqətini asanlıqla çəkən Kriş tez bir zamanda varlanmaq istəyir. O, məqsədinə çatmaq üçün nüfuzlu siyasətçi Simhaçalamın varlı qızı Mancunun sevgisini qazanmağı və onunla evlənməyi qərara alır. Gənc oğlan bunun üçün əvvəlcədən plan qurur və hərəkətə keçir.

Lakin Mancunun arxasınca düşdüyü bir vaxtda Kriş Minu kimi tanınan Minakşi adlı başqa bir qızla rastlaşır. Öz hisslərinə hakim ola bilməyən gənc gözlənilmədən Minuya aşiq olur. Beləliklə, Krişin zənginlik planları ilə səmimi duyğuları bir-birinə qarışır.

Rejissor B. Qopalın çəkdiyi «Maska» filmi 2009-cu ildə Hindistanda istehsal olunub. Döyüş və komediya janrlarını birləşdirən layihədə baş rolları Ram, Hansika Motvani, Şila və Mukeş Rişi canlandırıblar.