Doğmalar

Boks üzrə Olimpiya gümüş mükafatçısı Baldev Sinqh Çoudhari Hindistanın ən tanınmış idmançılarından biri idi. ABŞ-da peşəkar dünya çempionluğu uğrunda mübarizə apararkən mafiya qalmaqalına qarışır və bu səbəbdən rinqi tərk etmək məcburiyyətində qalır. O, illər boyu ürəyində qalan çempionluq arzusunu böyük oğlu Ancadı məşq etdirərək gerçəkləşdirmək istəyir, lakin oğlunun həyatla bağlı tamam başqa planları üzə çıxır.

Bu zaman ailənin kiçik oğlu Karan atasının köməyinə çatır. Təbiətcə xəyalpərəst bir musiqiçi olan gənc oğlan atasının yarımçıq qalmış ən böyük arzusunu yerinə yetirmək üçün boks idmanına üz tutur.

«Apne» filmi 2007-ci ildə Hindistanda istehsal olunub və rejissor Anil Şarma tərəfindən ekranlaşdırılıb. Döyüş və idman dramı janrında çəkilən filmin baş rollarında Dharmendra, Sanni Deol, Bobbi Deol və Şilpa Şetti Kundra çəkiliblər.