Shera

«Shera» filmi inşaat podratçısı Cay Xurana və onun polis müfəttişi işləyən həyat yoldaşı Şivaninin ailə hekayəsini təqdim edir. Cayın bacısının təhsil aldığı kollecdə narkotik maddələrin yayılması asayiş keşikçisi olan Şivanini hərəkətə keçirir. Qadın qətiyyət göstərərək böyük narkobaronun qardaşını dəmir barmaqlıqlar arxasına göndərir.

Çox keçmədən Cay təsadüfən amansız bir qətlin şahidinə çevrilir. O, təhlükəli cinayətkar qruplaşma rəhbərinin oğullarına qarşı məhkəmədə ifadə verməyi planlaşdırır. Lakin qanunsuz əməllərini gizlətmək istəyən cinayətkarlar Cayın ailə üzvlərini qaçıraraq onu susdurmaq üçün şantaj yolunu seçirlər.

1999-cu il istehsalı olan bu Hindistan döyüş filminin rejissoru T.L.V. Prasad tərəfindən çəkilib. Ekran əsərinin baş rollarında Mitxun Çakraborti, Gülşən Qrover, Vinita və Aşrani yer alıb.