Veerta

Varlı sənayeçi Balvant Ray qızı Umanı idarəçi direktoru Sunderlalın oğluna ərə verir. Qohum olmağa hazırlaşan bu şəxslərin əsas məqsədi ailənin bütün sərvətini ələ keçirməkdir. Tamahkar ata və oğul planlarını həyata keçirmək üçün sahibkarın yeganə qanuni varisi olan kiçik oğlu Amarın, yəni Munnanın aradan qaldırılmasını hədəfləyirlər.

Lakin sui-qəsd planı baş tutmur: kəndli Manqal Sinqh hücum edənlərin qarşısını alaraq uşağın həyatını qurtarır. Baş verən hadisə Munna ilə qorxmaz Manqal arasında sıx bir dostluğun yaranmasına səbəb olur. Həmin gündən etibarən onlar canilərə qarşı birgə mübarizəyə başlayırlar.

Hindistan istehsalı olan «Veerta» kriminal döyüş filmi rejissor Şibu Mitra tərəfindən çəkilib. Ekran əsəri 1993-cü ildə işıq üzü görüb. Əsas obrazları Sanni Deol, Jagdarshan Samra, Caya Prada və Şakti Kapur canlandırıblar.