Cəza

Polis müfəttişi Vicay Saksena Puca Kumari Tivari ilə ailə qurmaq arzusundadır. Lakin qızın atası ştat hökumətinə rəhbərlik edən varlı bir şəxsdir və gəncin maddi vəziyyətini bəyənməyərək bu sevgiyə qarşı çıxır. Ağır təhqirlə üzləşən Vicay həyatını vəkil Kiranla birləşdirir və onların Bobbi adlı bir qız övladı dünyaya gəlir.

Kirannın məhkəmədə polisin həbs etdiyi müttəhimləri müdafiə etməsi ailədə müəyyən narazılıqlara səbəb olur. Çox keçmədən quldurlar gənc qadını qətlə yetirirlər və bu hadisə ailənin həyatını alt-üst edir. Vicay cinayətkarları ədalət məhkəməsinə çıxarmaq üçün təhqiqata başladığı vaxt balaca qızı Bobbinin qaçırıldığını öyrənir.

Hindistan istehsalı olan «Cəza» (Jurmana) döyüş filmi rejissor T.L.V. Prasad tərəfindən lentə alınıb. Ekran əsəri 1996-cı ildə işıq üzü görüb. Əsas obrazları Mitxun Çakraborti, Rambxa, Aşvini Bhave və Jigyasa canlandırıblar.