40

Rusiya xüsusi xidmət orqanlarının zabiti kapitan Stıçkin məsuliyyətli əməliyyatın uğursuzluğunda haqsız yerə günahlandırıldıqdan sonra istefaya göndərilir. İşsiz qalan keçmiş hərbçi dolanmaq üçün şəxsi maşını ilə taksi fəaliyyətinə başlayır, ardınca isə nişanlısı onu tərk edir.

Yeni terror aktı təhlükəsi yarananda komandanlıq bu çətin tapşırığın öhdəsindən gələ biləcək peşəkar kimi dərhal Stıçkini xatırlayır. Şəxsi incikliklərini kənara qoyan kapitan hərəkətə keçir. Pavelets vağzalından Domodedovo hava limanına gedən elektrik qatarındakı terrorçunu tapmaq üçün onun cəmi bir saatdan az vaxtı var.

«40» filmi 2007-ci ildə Rusiyada ekranlaşdırılıb. Layihənin quruluşçu rejissoru və baş rol ifaçılarından biri Aleksandr Qalibindir; ekran əsərində həmçinin Dmitri Maryanov, Yuri Belyayev və İqor Vernik çəkiliblər.