Xilaskar

Hindistanın kəndlərindən birində nüfuzlu torpaq sahibi Qora Thakur, digər mülkədar Kasturilal və rüşvətxor məmurun köməyi ilə kəndlilərin torpaqlarını əllərindən alır. Hər şeyini itirən yerli sakin Krişna qanun qarşısında ədalət tapa bilməyincə quldurluq yolunu seçir və zorla alınan mülkünü geri qaytarmaq qərarına gəlir.

Rəsmi qurumlar onu təhlükəli cinayətkar elan edərək zərərsizləşdirilməsi üçün polkovnik Kaniri vəzifələndirir. Qiyamçının izinə düşən hərbçi bu qarşıdurmanın pərdəarxasını araşdırarkən anlayır ki, Krişnanı bu yola çəkən həqiqi səbəblər onu cəzalandırmaq istəyən şəxslər tərəfindən gizlədilir.

1993-cü ildə ekranlara çıxan «Xilaskar» (Yugandhar) döyüş və dram filminin rejissoru N. Çandradır. Ekran əsərində əsas rolları Mithun Çakraborti, Kabir Bedi, Sangita Biclanı və Manqal Dhillon canlandırıblar.