Saxta zərbə

Fırıldaqçı Xiaoshan qumarxana sahiblərini aldatmağa çalışarkən yaxalanır və mühafizəçilər tərəfindən küçəyə atılaraq döyülür. Bu zaman anasını axtarmaq üçün yollara düşən və döyüş sənətlərini dərindən bilən Ma Da adlı gənc ona kömək edir. Xilas olan Xiaoshan onunla birlikdə yoluna davam etmək qərarına gəlir.

Yolda Xiaoshan böyük məbləğdə pul daşıyan varlı bir gənci qarət etməyə cəhd göstərir. Plan baş tutmur və tərəflər arasında qarşıdurma yaranır. Lakin həmin gənc Ma Danın yüksək bacarığını görüb döyüşü saxlayır və hər iki səyyahı özü ilə aparır.

«Saxta zərbə» («Dian ma ling hou») filmi 1981-ci ildə Honkonqda istehsal olunub. Döyüş janrındakı ekran əsərinin rejissorları Shi Chen və Toni Liu, baş rol ifaçıları isə Chi Kuan-chun, Hon Kwok-choi, Candy Wen və Chu Tit-wodur.