Karma

Nümunəvi həbsxananın rəisi və keçmiş polis zabiti Rana Vişva Pratap Sinqh təhlükəli terror təşkilatının rəhbəri doktor Maykl Denqi təcridxanaya qəbul edir. Məhbusla baş verən qarşıdurmadan sonra Denq ondan intiqam alacağına söz verir. Çox keçmədən cinayətkarın silahdaşları həbsxanaya basqın təşkil edərək rəhbərlərini azadlığa çıxarır və Sinqhin ailəsini qətlə yetirirlər.

Yaxınlarını itirən keçmiş polis qaçan terrorçunu şəxsən cəzalandırmaq niyyətinə düşür. Səlahiyyətli orqanların razılığı ilə xüsusi əməliyyata başlayan qəhrəman mürəkkəb tapşırığı icra etmək üçün ölüm cəzasına məhkum olunmuş üç nəfəri öz tərəfinə çəkir.

Hindistan istehsalı olan macəra və döyüş janrlı «Karma» filminin rejissoru Subhaş Qhaydır. 1986-cı ildə çəkilmiş ekran əsərində əsas rolları Dilip Kumar, Nutan, Nasiruddin Şah və Ceki Şroff canlandırıblar.