Stone

Ətraf mühitin qorunmasına həsr olunmuş mitinqdə çıxış edən natiq snayper atəşi ilə qətlə yetirilir. Bu cinayətin yeganə təsadüfi şahidi isə damın üstündə olan və maddə təsiri altındakı bir bayker olur. Qatil onu görsə də, həmin an aradan götürə bilmir.

Çox keçmədən özlərini «Qəbirqazanlar» adlandıran bu motosikletçi dəstəsinin üzvləri növbə ilə öldürülməyə başlayır. Qatillərin izinə düşmək üçün gənc polis əməkdaşı Stone bu satanist qrupuna daxil olmaq və onların arasına sızmaq qərarına gəlir.

Avstraliya istehsalı olan «Stone» filmi 1974-cü ildə ekranlara çıxıb. Ekran əsərinin rejissoru Sendi Harbattdır və o, Derek Barns, Hyu Kiyas-Byorn və Leks Mitçell ilə birlikdə əsas rollardan birini canlandırıb.