Sərgərdan cəngavər

Taksi sürücüsü işləyən gənc Ho Şan davakar xasiyyəti ucbatından tez-tez müxtəlif münaqişələrin iştirakçısına çevrilir. Atası Lin Min Xun oğlunun bu cür həyat tərzini qətiyyən bəyənmir. Ho hər dəfə davalardan uzaq duracağına söz versə də, verdiyi vədi tuta bilmir və yenidən qarşıdurmalara qarışır.

Həmin ərəfədə şəhərə qisas arzusu ilə yaşayan üç yapon gəlir. Onlar uşaqlıqdan Lin Min Xuna nifrət hissi ilə böyüdülüblər, çünki müharibə dövründə ataları kapitan Mişimanın intiharına məhz onun səbəb olduğunu düşünürlər. Bu təhlükə qarşısında Ho Şan artıq sadəcə küçə döyüşlərinə deyil, ailəsinin həyatını xilas etməyə məcbur qalır.

1973-cü il istehsalı olan «Sərgərdan cəngavər» (Ying xiong ben se) Tayvan döyüş filminin rejissoru Din Şansidir. Əsas obrazları Cimmi Van Yüy, Yasuaki Kurata, Çen Peylin və Chung-Kuei Chang canlandırıb.