Don

Polislə toqquşmada ağır yaralanan Don ləqəbli qanqster xəstəxanada həyatını itirir. Cinayətkar dəstəni daxildən məhv etmək istəyən polis komissarı bu faktı gizli saxlayaraq rəhbərin yerinə oxşarını göndərmək qərarına gəlir. Bu vəzifə üçün ölən liderə zahirən çox bənzəyən Vicay Bxoqal adlı sadə bir şəxs seçilir.

Komissar saxta əhvalat uydurur: guya Don sağ qalıb, lakin güllə yarasından sonra yaddaşını tamamilə itirib. Beləliklə quldur şəbəkəsinə daxil olan Vicayı dərhal təhlükə gözləyir, çünki qruplaşmanın üzvü Roma onu öldürmək niyyətindədir. Saxta Don bu nifrətin səbəbini araşdırarkən öyrənir ki, həqiqi cinayətkar Romanın qardaşını və əmisi qızını qətlə yetirib.

1978-ci ildə Hindistanda istehsal olunmuş «Don» kriminal triller filminin quruluşçu rejissoru Çandra Barotdur. Baş rolları Amitabh Baççan, Zinat Aman, Pran və İftekxar canlandırıblar.