Chhupa Rustam

Professor Harbanslal Tibet dağlarında yerləşən Nangla vadisində qədim sivilizasiyaya məxsus qızıl məbəd aşkarlayır. Bu xəzinədən xəbər tutan Vikram Sinqh və oğlu Bahadur alimi qaçıraraq məbədin dəqiq yerini öyrənməyə çalışırlar.

Professor sirləri açmadıqda cinayətkarlar milyarder Racendra Caynın ailəsini hədəf alırlar. Onlar iş adamının həyat yoldaşı ilə oğlunu girov saxlayaraq qızı Ritanın Bahadura ərə verilməsini və cehiz kimi Nangla vadisinin torpaqlarını tələb edirlər. Doğmalarını xilas etmək üçün toy mərasiminə razılaşan Ritanı bu dəfə digər quldur Natvarlal qaçırır.

Macəra və döyüş janrında çəkilmiş Hindistan filmi «Chhupa Rustam» 1973-cü ildə nümayiş olunub. Ekran əsərinin rejissoru Vijay Ananddır və o, baş rolları Dev Anand, Ajit Khan və Prem Nath ilə bölüşür.