Sübut

Polis əməkdaşlarının gecə vaxtı böyük narkotik partiyasını ələ keçirmək məqsədilə başladığı əməliyyat fəlakətlə nəticələnir. Səhər xəbərləri üçün çəkiliş aparan iki televiziya müxbiri xüsusi təyinatlıların basqınını lentə almaq istəyir. Lakin hazırlıq barədə əvvəlcədən xəbər tutan cinayətkarlar hüquq-mühafizəçilərə pusqu quraraq onları avtomat atəşinə tuturlar.

Qanlı qarşıdurma zamanı hücum qrupu darmadağın edilir, lakin jurnalistlər əllərindəki kasetlə birlikdə hadisə yerindən qaça bilirlər. İndi həmin video hər kəs üçün əsas hədəfə çevrilir: mafiya şahidləri və kaseti məhv etmək, polis isə qatilləri tapmaq istəyir. Təcrübəli reportyorlar isə bu vəziyyətdən faydalanmaq qərarına gələrək lent yazısını hər iki tərəfə böyük məbləğə satmağı planlaşdırırlar.

ABŞ istehsalı olan «Felony» filminin rejissoru Devid A. Prayordur. 1994-cü ilin triller janrlı ekran əsərində baş rolları Ceffri Kombs, Eşli Lourens, Leo Rossi və Çarlz Nepyer canlandırıb.