Wrath of Man

Los-Ancelesdə fəaliyyət göstərən Fortico Security inkassasiya şirkətinin zirehli maşınları tez-tez qarətçilərin hədəfinə çevrilir və sonuncu hücum zamanı iki mühafizəçi həyatını itirir. Bu hadisədən sonra firmaya Patrik Hill adlı azdanışan britaniyalı işə qəbul edilir. Həmkarlarının sadəcə Eyç adlandırdığı bu yeni işçi fiziki hazırlıq və atıcılıq sınaqlarından güclə keçərək növbəyə yollanır.

Tezliklə onun olduğu yük maşınına da silahlı basqın edilir, lakin Eyç təkbaşına bütün cinayətkar dəstəni zərərsizləşdirir. Bu qəhrəmanlıq ona şirkətdə böyük hörmət qazandırsa da, yeni əməkdaş diqqət mərkəzində olmağa can atmır. Çünki bu təhlükəli işə düzəlməkdə onun tamamilə gizli və şəxsi məqsədləri var.

«Wrath of Man» filminin rejissoru Qay Riçidir. ABŞ və Böyük Britaniyanın ortaq istehsalı olan bu döyüş trilleri 2021-ci ildə ekranlara çıxıb. Əsas rolları Ceyson Steytem, Holt Makkellani, Ceffri Donovan və Coş Hartnett canlandırıblar.