İks-adamlar: Birinci dərəcə

«X-Men: First Class» fantastik döyüş filmi Çarlz Ksavye və Erik Lenşerrin gənclik illərindən bəhs edir. Hələ qabiliyyətlərini tam dərk etməyən bu iki gənc mutant bir araya gələrək yaxın dost və müttəfiq olurlar.

Onlar fövqəltəbii bacarıqlara malik uşaqların öz güclərini idarə etməsi üçün xüsusi məktəbin əsasını qoyurlar. Lakin gələcəyə dair baxışların fərqliliyi və aralarında baş verən kəskin fikir ayrılıqları bu iki yoldaşın yollarını birdəfəlik ayırır.

2011-ci ildə nümayiş olunan layihə ABŞ və Böyük Britaniyanın ortaq istehsalıdır və «X-Men» franşizasının tərkib hissəsidir. Rejissor Mettyu Vonun çəkdiyi ekran əsərində baş rolları Ceyms Makevoy, Maykl Fassbender, Kevin Beykon və Cennifer Lourens canlandırıblar.