Enemy

Uşaqlıq dostları olan Çojan və Raciv keçmiş polis işçisi — Racivin atası tərəfindən ciddi təlimlər alırdılar. Birgə hazırlıq oğlanlar arasında rəqabətə yol açır, yoldaşının bacarıqları isə Racivdə qısqanclıq yaradırdı. Məşqçinin qəfil ölümü hər şeyi dəyişir: qorxuya düşən atası Çojanı uzaqlara aparır və iki uşağın əlaqəsi birdəfəlik kəsilir.

İllər sonra Sinqapurda mağaza işlədən Çojan zahirən adi bir həyat sürür. Bununla belə, o, keçmiş vərdişlərindən əl çəkməyərək cinayətkarlara gizlicə mane olmağa davam edir. Məhəlləsindəki təhlükəli hadisələri və partlayışı araşdırarkən Çojan bu cinayətlərin arxasında muzdlu qatilə çevrilmiş köhnə dostu Racivin dayandığını öyrənir. Uşaqlıqdan qalan çəkişmə böyük qarşıdurmaya çevrilir.

«Enemy» trilleri 2021-ci ildə Hindistanda çəkilib və layihəyə Anand Şankar rejissorluq edib. Əsas obrazları Vişal, Arya, Mirnalini Ravi və Mamta Mohandas canlandırıblar.