Böyük əsgər

Qədim Çində Vuruşan çarlıqlar dövrü davam edir və ölkə daxili müharibələrlə sarsılır. Lyan və Vey qoşunları arasında baş verən qanlı döyüşdən sonra sağ qalanların sayı cəmi iki nəfər olur. Onlardan biri Vey ordusuna rəhbərlik edən gənc sərkərdə, digəri isə döyüşməkdən bezmiş yaşlı Lyan əsgəridir.

Sadə piyada yaralı düşmən komandirini əsir götürməyi bacarır. Əgər o, zadəgan əsiri sağ-salamat öz hökmdarına çatdıra bilsə, həm torpaq sahəsi qazanacaq, həm də doğma evinə qayıtmaq hüququ əldə edəcək. İki fərqli dünyanın adamı üçün təhlükələrlə dolu uzun və çətin bir yol başlayır.

«Böyük əsgər» macəra filmi 2010-cu ildə çinli rejissor Din Şen tərəfindən çəkilib. Çin və Honq Konqun ortaq istehsalı olan bu tarixi hərbi komediyada baş rolları Ceki Çan və Van Lihom ifa ediblər.