Vikinqlər

Min il əvvəl Skandinaviya döyüşçüləri kral Raqnarın başçılığı altında İngiltərə sahillərinə hücum edərək yerli torpaqları ələ keçirməyə çalışırlar. Şimal tayfaları Britaniya adalarını viran qoyaraq çoxsaylı basqınlar törədirlər. Həmin dövrdə iki gənc böyüyür: Raqnarın döyüşlərdə məğlubedilməz oğlu Eynar və əsl valideynlərini tanımayan kölə Erik.

Bir-birinə nifrət edən bu iki şəxs eyni atanın övladları olduqlarından xəbərsizdirlər. Onların arasındakı çoxillik ədavət Uels şahzadəsi Morqananın peyda olması ilə daha da kəskinləşir. Hər iki gənc əsir düşmüş bu zadəgan xanıma aşiq olduqdan sonra aralarındakı qarşıdurma pik həddə çatır.

1958-ci ildə ABŞ-da lentə alınan «Vikinqlər» filminin rejissoru Riçard Fleyşerdir. Macəra janrında olan bu ekran əsərində baş rolları Kirk Duqlas, Toni Körtis, Ernest Bornayn və Canet Li canlandırıb.