Milano calibro 9

«Milano calibro 9» filmi dəstə üzvlərinin bir-birinə ötürdüyü pul dolu çamadanın yoxa çıxması ilə başlayır. Nəticədə mafiya başçısına pul əvəzinə kağız parçaları çatır. Bütün şəriklər işgəncə ilə öldürülsə də, yalnız üç il həbs cəzası alan Uqo Piatstsa sağ qalır.

Cəzasını çəkib azadlığa çıxan kimi keçmiş yoldaşları onun arxasınca düşür. Cinayətkarlar pulları məhz onun oğurladığına tam əmindirlər, lakin onu dərhal aradan qaldırmırlar. Uqo isə heç bir günahı olmadığını sübut etməyə çalışır və oğurluğun arxasında kimin dayandığı sual altında qalır.

İtaliya istehsalı olan bu döyüş və cinayət filmini 1972-ci ildə rejissor Fernando Di Leo çəkib. Əsas rolları Qastone Moskin, Barbara Buşe, Mario Adorf və Frenk Vulf canlandırıb. Əsər «Milieu Trilogy» silsiləsinin bir hissəsidir.