Usta Z: İp Manın irsi

İp Man ilə qarşılaşmada məğlub olan Çun Tin-Çi 1961-ci ildə Honkonqda öz döyüş sənəti məktəbini bağlayır. O, əvvəlcə yalnız qaniçən cinayətkarları cəzalandıran və günahsızlara toxunmayan bir muzdlu kimi fəaliyyət göstərir. Lakin bir müddət sonra bu təhlükəli yoldan da uzaqlaşaraq balaca oğlunu böyütmək üçün kiçik bir ərzaq dükanı açır və sakit günlər yaşamağa çalışır.

Keçmiş döyüşçünün dinc həyat arzusu küçədə iki gənc qadını quldurların hücumundan xilas etdikdən sonra alt-üst olur. Müdaxiləsi nəticəsində Çun Tin-Çi şəhərin ən güclü cinayətkar şəbəkəsi ilə üz-üzə qalır. İndi o, ailəsini qorumaq üçün böyük bir mafiya sindikatına qarşı mübarizə aparmaq məcburiyyətindədir.

2018-ci il istehsalı olan «Ip Man Legacy: Master Z» filmi Çin və Honkonq kinematoqrafçılarının birgə layihəsidir. Döyüş və kriminal janrındakı ekran əsərinin rejissoru Yuen Vu-Pinqdir. Əsas rolları Maks Çjan, Ada Lyu, Kevin Çen və Mişel Yeo canlandırıblar.