Rapa Nui

«Rapa Nui» filmi hadisələri Pasxa adasında yerli qəbilələr arasında gərginliyin yarandığı dövrə aparır. Hakim mövqedə olan uzunqulaqlılarla qısaqulaqlılar təbəqəsi arasında ziddiyyətlər kəskinləşir. Bu ictimai qarşıdurmanın ortasında uzunqulaqlı zadəgan Noro qarşı tərəfdən olan Ramana adlı qıza aşiq olur. Ramanaya onların hər ikisinin uşaqlıq dostu, qısaqulaqlı Make də sevgisini bəsləyir.

Qəhrəmanların gələcəyini adada hər il təşkil edilən təhlükəli yarış müəyyənləşdirir. Qaydalara əsasən, qonşu adadan bütöv quş yumurtasını gətirən iştirakçı həm sevdiyi qızla evlənmək hüququ qazanır, həm də quş-insan statusu alaraq tanrının nümayəndəsinə çevrilir.

Tarixi macəra filminin quruluşçu rejissoru Kevin Reynoldsdur. 1994-cü ildə ABŞ-da istehsal olunmuş layihədə əsas rolları Ceyson Skott Li, Esay Morales, Sandrin Holt və Eru Potaka Dyus ifa ediblər.