Qaçış planı

Rey Breslin mühafizə sistemləri üzrə ixtisaslaşıb və həbsxanaların təhlükəsizlik boşluqlarını üzə çıxarmaqla məşğuldur. Öz sahəsində ən yaxşılardan sayılan mütəxəssis növbəti tapşırığı qəbul edir. O, ən son texnologiyalarla təchiz olunmuş və «Sərdabə» adlandırılan gizli cəzaçəkmə müəssisəsinin etibarlılığını yoxlamalıdır.

Lakin hadisələr planlaşdırıldığı kimi getmir və Reyə qarşı xəyanət edilir. Tələyə düşdüyünü anlayan mütəxəssis oradan çıxmaq üçün başqa bir məhbus olan Emil Rotmayer ilə əməkdaşlıq etmək məcburiyyətində qalır. İki məhbus birlikdə keçilməz görünən nəzarət sistemini aldatmağa çalışır.

ABŞ istehsalı olan «Escape Plan» döyüş filmi 2013-cü ildə rejissor Mikael Hofström tərəfindən çəkilib. Baş rolları Silvestr Stallone və Arnold Şvartsenegger paylaşıb, digər obrazları isə Cim Kevizel və Vinni Cons canlandırıb. Bu ekran əsəri eyniadlı franşizanın ilk filmidir.