Üç iks

Ekstremal idman ustası Ksander Keyc əksər insanların bacarmayacağı təhlükəli fəndləri asanlıqla yerinə yetirir. Bu xüsusi bacarıqlar və sərt xarakter Milli Təhlükəsizlik Agentliyinin diqqətini çəkir. Xüsusi xidmət orqanları onu əməkdaşlığa cəlb edir və beləliklə, Keyc «Üç iks» kod adı ilə fəaliyyət göstərən yeni nəsil casusa çevrilir.

Ən müasir texnoloji casus avadanlıqları və silahlarla təchiz olunan baş qəhrəman Praqaya yollanır. Onun əsas vəzifəsi oradakı rus cinayətkar qruplaşmasının sıralarına daxil olmaqdır. Qarşısına qoyulan tapşırığı yerinə yetirməyə çalışan Keycin yolunda gözlənilmədən Yelena adlı sirli bir qadın peyda olur.

2002-ci ildə ABŞ-da istehsal olunmuş «Üç iks» döyüş filminin rejissoru Rob Koendir. Eyniadlı franşizaya start verən ekran əsərində baş rolları Vin Dizel, Semyuel L. Cekson, Aziya Arcento və Denni Trexo canlandırıblar.