Böyük bərabərləşdirici

Keçmiş kəşfiyyat əməkdaşı Robert Makkol vəfat etmiş həyat yoldaşına verdiyi sözə əməl edərək keçmişini geridə qoyub dinc həyat sürməyə çalışır. O, adi bir mağazada satıcı işləyir və gecələrini yerli kafedə kitab oxumaqla keçirir. Lakin kafedə tanış olduğu və cinayətkar şəbəkənin təzyiqi altında yaşayan gənc Terinin zorakılığa məruz qalması onun planlarını alt-üst edir.

Ədalətsizliyə biganə qala bilməyən Robert qızın müdafiəsinə qalxır və köhnə bacarıqlarını yenidən işə salır. Bu addım onu güclü bir cinayətkar qruplaşma ilə üz-üzə gətirir. Təqaüd həyatına son qoyan baş qəhrəman qanunun qoruya bilmədiyi günahsız insanları müdafiə etməyə və haqqı bərpa etməyə başlayır.

2014-cü ildə ABŞ-da istehsal olunmuş «The Equalizer» triller filminin rejissoru Antuan Fukuadır. Ekran əsərində baş rolu Denzel Vaşinqton canlandırıb, digər rollarda isə Marton Çokaş, Xloya Qreys Morets və Devid Harbor çəkiliblər.