Döyüş qaydaları

1996-cı ildə dəniz piyadaları polkovniki Terri Çildersə Yəməndəki ABŞ səfirini və onun ailəsini təxliyə etmək tapşırılır. Səfirliyin binası önündə başlayan aksiya tezliklə nəzarətdən çıxır və radikal etirazçılar binanı atəşə tutur. Hücuma məruz qalan və itkilər verən hərbçilərə komandirlik edən Çilders kütləyə qarşı cavab atəşi açmaq əmri verir. Bu addım onlarla insanın, o cümlədən dinc sakinlərin həlak olmasına və ağır yaralanmasına gətirib çıxarır.

Beynəlxalq qalmaqal fonunda ABŞ rəhbərliyi vəziyyətdən çıxış yolu axtarır və prezidentin milli təhlükəsizlik üzrə müşaviri Bill Sokal bütün məsuliyyəti polkovnikin üzərinə atmaq qərarına gəlir. Dinc sakinləri qəsdən qətlə yetirməkdə suçlanan komandiri hərbi tribunal gözləyir. Çilders məhkəmədə onu müdafiə etməsi üçün keçmiş silahdaşı Heyz Hoccisə müraciət edir. Təqaüd ərəfəsində olan Hoccis 1968-ci ildə Vyetnamda onun həyatını qurtarmış dostunun xahişini geri çevirə bilmir.

«Döyüş qaydaları» adlı hərbi dram filmi 2000-ci ildə təqdim olunub. Layihənin rejissoru Uilyam Fridkindir, ekran əsəri ABŞ, Böyük Britaniya, Kanada və Almaniya tərəfindən birgə istehsal edilib. Baş rolları Tommi Li Cons, Samuel L. Cekson, Qay Pirs və Ben Kinqsli canlandırıblar.