Balaca Sezar

Riko ləqəbli xırda cinayətkar Sezar Enriko Bandello dostu Co Massara ilə birlikdə bəxtini sınamaq üçün Çikaqoya yollanır. Onlar Sem Vettorinin cinayətkar dəstəsinə qoşulsalar da, hədəfləri fərqli çıxır. Rəqqas olmaq istəyən Co daha çox şöhrət və qadınların diqqətini arzulayır, buna görə də Olqa ilə tanış olduqdan sonra qanunsuz işlərdən uzaqlaşmağa başlayır.

Bu vaxt ərzində Riko sürətlə irəliləyərək dəstənin başına keçir və Çikaqo yeraltı aləmində yüksək mövqe qazanır. Lakin qazandığı güclə yanaşı onun şübhələri də artır. Riko getdikcə dostu Conun nə vaxtsa ona xəyanət edəcəyinə daha çox inanır.

1930-cu ildə ABŞ-da istehsal olunmuş «Balaca Sezar» filminin quruluşçu rejissoru Mervin LeRoydur. Baş rolları Edvard Q. Robinson, Sidni Blekmer, Qlenda Farrell və Tomas E. Cekson ifa ediblər.