Qurdlar imperiyası

Parisin türk məhəlləsində bir-birinə çox bənzəyən qadınların ard-arda vəhşicəsinə qətlə yetirilməsi yerli asayiş keşikçilərini hərəkətə gətirir. Bu qanlı cinayətlərin izinə düşən gənc polis Pol qatilin kimliyini və qurbanları hansı səbəbdən seçdiyini anlamağa çalışır. Çıxılmaz vəziyyətdə qalan Pol çətinliyi aradan qaldırmaq üçün nüfuzu birmənalı olmayan təcrübəli həmkarı Şifferdən kömək istəyir.

İki polis əməkdaşı bir araya gələrək sirli qatilin izinə düşür və təhlükəli axtarışlara başlayır. Araşdırma dərinləşdikcə tərəfdaşlar qaranlıq sirlərlə və gizli qalan cinayət bağları ilə üzləşirlər. Hər addım onları məkrli cinayətkarın izinə bir qədər də yaxınlaşdırır.

Rejissor Kris Naonun çəkdiyi «Qurdlar imperiyası» (L'empire des loups) filmi 2005-ci ildə Fransa, İtaliya və Türkiyənin birgə istehsalı kimi işıq üzü görüb. Ekran əsərində əsas rolları Jan Reno, Robert Hoen, Laura Morante və Filipp dü Janeran canlandırıb.