Mən dördüncüyəm

Con Smit zahirən adi bir yeniyetmə təsiri bağışlasa da, əslində uzaq planetdən gəlmiş və sağ qalan azsaylı yadplanetlilərdən biridir. Onu məhv etmək istəyən qəddar düşmənlər addım-addım izinə düşüblər. Bu səbəbdən Con qəyyumu Henri ilə birlikdə daima şəhərləri dəyişir, saxta adlar arxasında gizlənir və getdiyi hər yerdə keçmişi olmayan bir yadelli kimi qalır.

Ohayo ştatındakı sakit qəsəbəyə köçdükdən sonra gəncin həyatı fərqli istiqamət alır və o, burada həm sevgisi ilə qarşılaşır, həm də ilk dəfə bir məkanı öz evi kimi qəbul edir. Lakin təqibçilərlə qarşılaşmaq qaçılmazdır və Con gizli qalmış fövqəltəbii güclərini üzə çıxararaq xalqının qədim düşmənlərinə qarşı mübarizəyə başlamalıdır.

«I Am Number Four» fantastik macəra filmi 2011-ci ildə ABŞ və Hindistan kinematoqrafçıları tərəfindən istehsal olunub. Ekran əsərinin quruluşçu rejissoru Di Cey Karuzo, baş rol ifaçıları isə Patrik Sibis, Bo Mirçoff, Emili Uikerşem və Molli Makginnisdir.