Virus faktoru

Alim Kenner yeni bioloji silah hazırlamaq məqsədilə çiçək virusunun nümunəsini oğurlayır. ABŞ hərbçiləri onu yaxalamağa müvəffəq olsa da, tədqiqatçı təhlükəli maddəni yalnız ailəsi ilə birlikdə Norveçə çatdırılacağı təqdirdə təhvil verəcəyini bildirir.

Eyni vaxtda atışma zamanı başından güllə yarası alan Con adlı polisin həyatı təhlükə altına düşür. Həkimlər gülləni çıxara bilmir və onun yaşamaq üçün cəmi iki həftə vaxtı qalır. Həmin müddətdə Con varlığından xəbərsiz olduğu böyük qardaşını tapmalı, ağlını itirmiş xüsusi təyinatlı döyüşçünü dayandırmalı və dünyanı fəlakətdən qorumalıdır.

"Virus faktoru" filmi 2012-ci ildə Çin və Honkonq kinematoqrafçılarının birgə istehsalı ilə lentə alınıb. Kriminal döyüş janrında olan ekran əsərinin rejissoru Dante Lamdır, əsas rolları isə Filip Kyun, Eleyn Tszin, Ron Smurenburg və Bill Li Man-Puy canlandırıblar.