Zərbə dalğası: Honkonq uğrunda döyüş

Honkonqlu istehkamçı Pun Sinfun minanı zərərsizləşdirmə əməliyyatı zamanı səhvə yol verir və güclü partlayış nəticəsində ayağının bir hissəsini itirir. Protez taxıb reabilitasiya keçsə də, rəhbərlik onun sahəyə qayıtmasına razılıq vermir və ofis işi təklif edir. Bu münasibəti xəyanət sayan mütəxəssis qalmaqalla polis sıralarını tərk edir, daha sonra isə insanların ölümü ilə nəticələnən terror aktı törədir.

Nəticədə saxlanılan Pun huşunu və yaddaşını itirir, törətdiyi hadisələri xatırlamır. Eyni zamanda şəhərdə yeni partlayışlar zənciri başlayır və bu hücumların arxasında «Vendetta» adlı radikal qruplaşmanın dayandığı məlum olur.

«Chai dan zhuan jia 2» adlı döyüş və triller filmi 2020-ci ildə Çin və Honkonq tərəfindən birgə istehsal olunub. Ekran əsərinin rejissoru Herman Yaudur, əsas rolları isə Uilfred Lau, Ron Nq, Kam-Fung Chan və Adam Berry ifa edib.