Zamanla yarış

1990-cı ildə Çinin cənub-şərqində polis kapitanı Çjun Çen kiçik Çanpu şəhərinə xidmətə göndərilir. Günün günorta çağı ticarət mərkəzinin qapılarının bağlı olduğunu görən zabit şübhələnir. Məlum olur ki, həmin an binaya «Qartal» adlı qəddar quldur dəstəsi basqın edib. Kapitan kömək gözləmədən içəri daxil olsa da, cinayətkarları saxlaya bilmir və əsir düşür. Dəstə başçısı Şahin ləqəbli Çjan Sun onu öldürmür, sadəcə hərəkətdə olan avtomobildən bayıra atır.

Ölümdən dönən polis əməkdaşı cinayətkarları yaxalamaq üçün dərhal xüsusi istintaq qrupu yaradır. Bankları, zərgərlik dükanlarını və iri ticarət nöqtələrini hədəf alan quldurlar silahlı basqınlarını davam etdirirlər. Hüquq-mühafizə orqanlarının bütün cəhdlərinə baxmayaraq, təcrübəli soyğunçular daim polislərdən bir addım öndə olmağı bacarırlar.

«Zamanla yarış» detektiv döyüş filmi 2020-ci ildə Çin və Honkonq kinematoqrafçıları tərəfindən birgə istehsal olunub. Ekran əsərinin rejissoru Lau Ho-Lüundur. Baş rolları Van Tsyan-yüan, Mişel Vay, Rok Tszı və Van Çaobey canlandırıblar.