Cəhənnəm həbsxanası

Cənubi Koreyanın ciddi rejimli cəzaçəkmə müəssisəsində Pələng və Viper ləqəbli liderlərin dəstələri arasında amansız münaqişələr səngimək bilmir. Asayişi bərpa edib vəzifədə yüksəlmək istəyən nəzarətçi Li He-myon buraya yeni köçürülən nüfuzlu kriminal avtoritet Li The-sikin gücündən yararlanmaq qərarına gəlir. Nüfuzlu məhbus dərhal rəqiblərini özünə tabe edir və dustaqlar arasında müvəqqəti sakitlik yaranır.

Lakin müəssisə rəhbəri vəzifəsi gözlənildiyi kimi Li He-myona deyil, qəddar Ço Phyon-hoya qismət olur. İdarəetməni ələ alan yeni rəis qaranlıq qaydalar tətbiq edərək məhbuslara qarşı təzyiqlərə başlayır. Onun əsas hədəfi isə hamının çəkindiyi Li The-sik olur.

2021-ci il istehsalı olan «Asurado» filmi Cənubi Koreya kinosunun döyüş və kriminal janrlarını birləşdirir. Ekran əsərinin quruluşçu rejissoru Yun Yo-çhandır, əsas rolları isə Çon Sın-hun, Hvan İn-mu, Li Dal-hyon və Li Sol-qu canlandırıb.