Qaçış

Şimali Koreya sərhədçisi Lim Gyu-nam on illik hərbi xidmətinin sonuna yaxınlaşır və gizlicə Cənuba keçmək planları qurur. Onun hazırlıqlarını güdən əsgər yoldaşı Kim minalanmış ərazilərin xəritəsini oğurlayır. Lakin qazıntı işləri apararkən patrul tərəfindən yaxalanır və qaçış şübhəsi Limin də üzərinə düşür.

İşi araşdırmaq üçün göndərilən təhlükəsizlik xidmətinin zabiti Gyu-namın uşaqlıq dostu çıxır. O, bəzi dəlillərə göz yumaraq Limə general yavəri kimi xidmətə davam etməyi təklif etsə də, gənc sərhədçi bu təklifi qəbul etmir. O, həbsdəki Kimi xilas edib yaxınlaşan leysan torpağı yumamış və xəritəni yararsız hala salmamış axşama qədər sərhədi keçməyi qarşısına məqsəd qoyur.

Cənubi Koreya istehsalı olan «Qaçış» (Talju) döyüş filmi 2024-cü ildə ekranlara çıxıb. Ekran əsərinin rejissoru Li Con-pildir. Baş rolları Kim San-hın, Can Yo-hun, Yu Ci-van və Çhve Min-u canlandırıblar.