Düşmənimin düşməni

ABŞ xüsusi xidmət orqanları serb polkovniki Voynoviçi Haaqa məhkəməsinə çıxarmaq üçün Belqraddakı Rusiya səfirliyindən qaçırır. Cavab addımı olaraq serb döyüşçüləri Buxarestdəki Amerika səfirliyini ələ keçirir, səfiri öldürür və öz komandirlərinin dərhal azad edilməsini tələb edirlər.

Bu hadisədən bir qədər əvvəl Piter Veller və Deril Hannanın canlandırdığı kompüter mütəxəssisləri səfirliyə gəlmişdi. Onların məqsədi hələ soyuq müharibə dövründən binanın altında qalmış nüvə bombasını zərərsizləşdirmək idi. Əsir götürülənlər arasında mütəxəssislərdən birinin oğlu da var və Pentaqonun göndərdiyi xüsusi təyinatlı dəstə serblərin ciddi müqaviməti ilə üzləşir.

«Diplomatic Siege» triller filminin quruluşçu rejissoru Qustavo Qref-Marinodur. 1999-cu ildə ABŞ-da istehsal olunmuş layihədə Uve Oksenknext, Konstantin Barbulesku, Stiv İstin və Klaudiu Trandafir kimi aktyorlar da çəkilib.