Qırıcı

ABŞ ordusunun gizli anqarına hücum edən naməlum qüvvələr radarlara düşməyən müasir qırıcı təyyarəni qaçırırlar. Bu təhlükəli planın arxasında cəngəlliklərdə gizlənən zəngin bir cinayətkar dayanır. O, artıq strateji peyklərin şifrələrini ələ keçirib, nüvə sualtı qayığını məhv edib və indi də qaçırılmış hərbi təyyarə ilə dövlətləri təhdid etmək niyyətindədir.

Böyük böhranın qarşısını almaq üçün rəhbərlik peşəkar pilot Rayan Mitçellə xüsusi tapşırıq verir. Təcrübəli hərbçi düşmənin hərbi bazasını taparaq təyyarəni zərərsizləşdirməlidir. Lakin oğurlanmış təyyarənin sükanı arxasında öz yaxın dostunun əyləşdiyini öyrənən Rayan çətin vəziyyətlə üzləşir.

1999-cu ildə ABŞ-da istehsal olunmuş «Stealth Fighter» filminin rejissoru Cim Vaynorskidir. Döyüş və triller janrında çəkilmiş ekran əsərində baş rolları Kostas Mendilor, Con Uertas, Mark Adeyr-Rios və Pol Terrell Kleyton canlandırıblar.