Arena

Uzaq gələcəkdə qalaktikalararası kosmik stansiyada müxtəlif sivilizasiyaların nümayəndələri arasında hər il amansız döyüş turniri təşkil olunur. Artıq əlli ildir ki, Yer kürəsi təmsilçiləri digər dünyalardan olan nəhəng və güclü canlılara uduzaraq çempionluq tituluna həsrət qalıblar. Nəhayət, bu vəziyyəti dəyişmək üçün yarışlara Stiv Armstronq adlı qüvvətli bir gənc qatılır.

İnsanlığın adından mübarizə aparan Stiv təkcə ringdəki amansız rəqiblərlə qarşılaşmır. O, həm də gələcəyin idman yarışlarını bürümüş korrupsiyalaşmış ədalətsiz sistemə qarşı çıxmaq məcburiyyətində qalır. Qarşısına çıxan maneələri ard-arda dəf edən qəhrəman kosmik çempionluq pilləsinə yüksəlməyə çalışır.

1989-cu il istehsalı olan «Arena» filmi fantastik döyüş janrında çəkilib. İtaliya istehsalı layihənin quruluşçu rejissoru Piter Manuqyandır. Filmin əsas rollarını Mark Alaymo, Brett Porter, Robert Spefford və Qreydi Klarkson canlandırıblar.